तनिकऽ सा पिसान बा, नेवान कइसे होई?
घरे घीउ-दूध नाहीं,
गाइ गभिनाइल।
खरचा पहाड़ जइसन,
करजा नऽ भराइल।
लइका रूख-सूख खाइ जवान कइसे होई?
तनिकऽ सा पिसान बा, नेवान कइसे होई?
कुछहू तऽ भेजि देतऽ
अबकी महिनवां।
फिसियो भराइल नाहीं,
पढ़ी कइसे मुनवां।
संगी-संघातिन में फिर मान कइसे होई?
तनिकऽ सा पिसान बा, नेवान कइसे होई?
रजुआ कऽ काका ओके
भेजलेन हं नरखा।
आवे के कहले बाटें
पड़ले पे बरखा।
मिलन मोर- तोर ए परान कइसे होई?
तनिकऽ सा पिसान बा, नेवान कइसे होई?
- राजेश मिश्र
कोई टिप्पणी नहीं:
एक टिप्पणी भेजें